Yoon Na Mil Mujh Sey Khafa Ho Jaisey

Yoon Na Mil Mujh Sey Khafa Ho Jaisey
Saath Chal Moj-E-Saba Ho Jaisey

Log Yoon Dekh Key Hans Detey Hain
Tu Mujhey Bhool Gaya Ho Jaisey

Mout Bhi Aai To Iss Naaz Key Saath
Mujh Peh Ahsaan Kiya Ho Jaisey

Hichkiyan Raat Ko Aati Hi Gayen
Tu Ney Phir Yaad Kiya Ho Jaisey

Aisey Anjaan Baney Bethey Ho
Tum Ko Kuch Bhi Na Pata Ho Jaisey

Zindagi Beet Rahi Hey Danish
Aik Bey-Jurm Saza Ho Jaisey