muhabbaton mein dikhaave kii dostii na milaa

muhabbaton mein dikhaave kii dostii na milaa
agar gale nahiin milataa to haath bhii na milaa


gharon pe naam the naamon ke saath ohade the
bahut talaash kiyaa koii aadamii na milaa


tamaam rishton ko main ghar pe chhor aayaa thaa
phir isake baad mujhe koii ajanabii na milaa


bahut ajiib hai ye qurbaton kii duurii bhii
vo mere saath rahaa aur mujhe kabhii na milaa


Khudaa kii itanii barii qaayanaat mein main ne
bas ek ShaKhs ko maangaa mujhe vo hii na milaa